Түркияда елдің оңтүстік-шығысындағы жойқын жер сілкінісінен кейін жаппай қамауға алу жұмыстары басталды. Олардың кейбірі мародерлік пен алаяқтық жасады деп күдіктелсе, енді біріне құрылыс жұмыстарын дұрыс жүргізбеді деген айып тағылып отыр, деп хабарлайды TRT Haber.
Телеарнаның хабарлауынша, Бас прокуратура елдің 11 провинциясында құрылыс жұмыстарын дұрыс жүргізбеді деген айыппен 564 күдіктіні анықтаған. Осылайша олардың 160-ы қамауға алынса, 175-іне сот бақылау орнатқан. Бұдан бөлек 71 күдіктіге тұтқындау және тағы 61 күдіктіге қамауға алу туралы ордерлер берілген. Сондай-ақ тағы алты адамның шетелде екендігі анықталды. Сол сияқты аталған істе күдікті деп танылған 11 адам қайтыс болғаны белгілі болды. Түрік полициясы, сонымен бірге жер сілкінісінен зардап шеккен аудандардағы ұрлық, тонау және алаяқтық фактілерін де тексеріп жатыр әрі ол бойынша күдікті ретінде 282 адам танылып, олардың 181-і қамауға алынған. РЕКЛАМА Айта кетейік, Түркия мен Сириядағы жойқын жер сілкінісінің салдарынан қайтыс болғандар саны 50 мыңнан асып кетті. Сондай-ақ, 23 ақпан күні, таңертең жер сілкінісі Тәжікстанда магнитудасы 7,3 болатын жер сілкінісі болды.