Туризмді дамыту мақсатында Қазақстанда шетелдіктер үшін елге келу және болу тәртібі жеңілдетілді. Бұл туралы Ішкі істер министрі Ержан Сәденов мәлімдеді.
Негізгі туристік аймақтарда қауіпсіздікті қамтамасыз ету үшін туристік полиция бөлімшелері жұмыс істейді. Олар шет тілдерін біледі, туристерге көмектеседі және заңсыз тасымалдауды болдырмайды.
105 елдің азаматтары электрондық виза арқылы Қазақстанға кіре алады. Сондай-ақ, IT-мамандарға арналған Digital Nomad Visa және туристерге арналған Neo Nomad Visa енгізілді. Қабылдаушы тарап шетелдік азаматтың келуі туралы хабарламаны онлайн жібереді.
Әуежайларда және ірі шекара өткелдерінде QR-коды бар «туристік карталар» беріледі. Онда елде болу ережелері, шұғыл қызметтер мен байланыс операторлары туралы ақпарат болады.
Көші-қон қызметтерін кеңейту үшін QazETA мобильді қосымшасы әзірленуде. Ол арқылы шетелдіктер ЖСН ала алады және көші-қон саласындағы көптеген қызметтерге қол жеткізе алады. Тиісті түзетулер Парламентте қаралуда.
Туристік орындарға апаратын жолдар жөнделуде. Алматы-Өскемен жолындағы жұмыстар аяқталып, жол жүру уақыты 4 сағатқа қысқарды.
124 вокзал жаңғыртылуда немесе жаңадан салынуда. Сұраныстың артуына байланысты туристік бағыттарға қосымша 15 пойыз қатынайды.
