Өткен жылы Шымкентте заңсыз тұрғызылған немесе құрылыс нормаларына сәйкес келмеген 4 құрылыс нысаны сот шешімімен бұзылды. Ал биыл жыл басынан бері тағы 8 құрылыс нысанын бұзу туралы сот шешімі қабылданды.
Бұзылатын нысандардың қатарында Шымкент қаласының Бас жоспарына сәйкес келмейтін, заңсыз салынған, рұқсатсыз жұмыс істеп тұрған ғимараттар да бар. Қаланың Бас жоспары 2023 жылдың 17 қазанында Қазақстан Республикасы Үкіметінің №916 қаулысымен бекітілді. Бұл жоспарға сәйкес, қала аумағындағы құрылыс аумақтары, көше енділіктері және қызыл сызықтар нақты белгіленіп, қаланың даму болашағы айқындалды.
Осыған байланысты Шымкентте қалалық орта сапасы және бақылау басқармасы мен құрылыс нысандарының меншік иелері арасында келісімдер жасалып, бұзу жұмыстарын орындау үшін арнайы шаралар қабылданды. Мысалы, 2025 жылдың қаңтар айында С.Бәйтереков көшесіндегі үш қабатты «КРОК» сауда орталығының ғимараты және Абай ауданындағы Аққамшы көшесіндегі екі қабатты ғимарат бұзылды.
Бұл жұмыстар қаладағы құрылыс салуды ретке келтіріп, қала инфрақұрылымын жақсартуға және тұрғындардың қауіпсіздігін қамтамасыз етуге бағытталған.
Шымкент қаласының Бас жоспары бойынша құрылыс нысандарын бұзу:
1.Қала инфрақұрылымын дамыту және көше енділігін қамтамасыз ету.
- Заңсыз және құрылыс нормаларына сәйкес келмейтін ғимараттарды жою.
- Құрылыс салуды ретке келтіру және қауіпсіздікті қамтамасыз ету.
- Тұрғындардың өмір сүру жағдайын жақсарту бағыттары бойынша іске асырылады.
Осы жұмыстардың нәтижесінде қалада құрылыс саласын реттеу, қауіпсіздікті арттыру және инфрақұрылымды жақсарту жұмыстары жалғасып, Шымкенттің болашақтағы дамуына үлкен үлес қосады деген сенім бар.
