Президент Қасым-Жомарт Тоқаев Ұлттық құрылтайдың IV отырысында ономастика саласындағы жаңа ұстанымдарды айқындап берді.
– Ел тарихында айрықша рөл атқарған әйгілі бабаларымыздың есімі көптеген елді мекен мен көшелерге берілген. Енді осымен тоқтайық. Өткен заман қайраткерлерінің атын ел жадында сақтау мәселесіне мейлінше салмақты көзқараспен қараған жөн. Қалалар мен көшелердің атауынан халқымыздың төл тарихы көрініс табуы қажет, – деді Қасым-Жомарт Тоқаев.
Мемлекет басшысының айтуына қарағанда, әдемі жер-су атауларын және халық ішінде кең таралған дәстүрлі атаулар толық пайдаланылмай жатыр.
– Бірақ ауыл-аймақтардың тарихи тұрғыдан ескірген атауларын өзгерту мәселесіне мұқият қараған жөн. Бұл жерде ешқандай науқаншылдық болмауы керек. Халық арасында жан-жақты түсіндіру жұмысын жүргізіп, тұрғындардың пікірін ескеру маңызды, – деді Президент.
Айта кету керек, құрылтайдың панельдік сессиялары кеше басталған. Ол секциялардың тақырыптары азаматтық қоғам, мәдениет, өнер, руханият, білім және ғылым, әлеуметтік-экономикалық даму мәселелерін қамтыды.
