Наурыз – ықылым заманнан жаңару мен тазалық айы. Ағаш егу, үй-жайды тазарту, бұлақ көзін ашу сияқты жұмыстар осы наурыз айында атқарылады. Бұл – жаңа жылға, жаңа күнге жаңарып, тазарып қадам басу дегенді білдірсе керек. Сонымен қатар, Наурыз мерекесі қарсаңында ескі-құсқы заттарды лақтырып, отпен аластау рәсімі де өткізілетін болған.
Бүгінде осы дәстүр жаңғыртылды. 14-23 наурыз аралығындағы «Наурызнама»онкүндігі аясында жер-жерде тазалық жұмыстары атқарылып, көшеттер егіліп, арық-атыздар қоқыстан тазартылады. Тіпті Наурызнаманың бір күні арнайы Тазару күні болып бекітілген. Одан бөлек жыл бойы елімізде жыл бойы «Таза Қазақстан» республикалық экологиялық акциясы өткізіліп тұрады.
Бүгін Шымкентте қалалық жайлы ортаны дамыту басқармасының ұйымдастыруымен аталған акция аясында Әл-Фараби ауданында орналасқан «Кілт» аумағында сенбілік өтті. Әл-Фараби ауданы әкімдігінің аппараты, экология департаменті мен жайлы ортаны дамыту басқармасының 150-ге жуық қызметкері мен ардагерлер осы аумақты қоқыстан тазартып, тротуарларды сыпырып, ағаштардың түбін әктеді.
Аумақтағы қоқыстарды тасымалдауға 10 техника жұмылдырылды.
