Бүгін елімізде мектеп оқушылары арасында домбырашылар челленджі өтті. “Күй күмбірі” республикалық челленджінде жас домбырашылар бір мезетте Құрманғазының “Балбырауын”, “Адай” күйлерін, Ә.Желдібаевтың “Ерке сылқым”, Н.Тілендиевтің “Әл қисса” күйлерін орындады. Аталған іс-шараға Шымкент қаласынан Ы. Алтынсарин атындағы №65 мектеп-гимназиясының “Мұрагер” ансамбліндегі 120 оқушысы қатысты.
Осындай челлендж өткізудегі мақсат – балалардың бойында рухани-адамгершілік мәдениет, эстетикалық, патриоттық сезімдерін тәрбиелеу, елдің мәдени мұрасын сақтау, балалардың домбырада орындау өнерін насихаттау. Сонымен қатар, қазақ халқының музыкалық мәдениетіне оқушылардың қызығушылығын ояту, орындаушылық дағдыларын қалыптастыру, қазақ халқы аспаптары туралы білімдерін кеңейту, домбырада музыка орындаудың ұжымдық түрлерін жетілдіру.
Домбырашылар челленджі – бұл балалар, жастар, педагогтер мен ата-аналардың музыкалық шеберлігін танытатын және бүкіл елді домбыра үнімен біріктіретін ерекше шара. Оған барлық тілек білдіруші қатыса алады. 2023 жылдан бастап челлендж барлық білім беру ұйымдарында ұйымдастырылып келеді және ол маңызды мәдени оқиғаға айналды. Челлендж «Адал азамат» біртұтас тәрбие бағдарламасы мен «Наурызнама» іс-шаралар жоспары аясында ұйымдастырылады.
Айта кетейік, Наурыз мейрамын мерекелеу 14-23 наурыз аралығында еліміздің барлық мектептерінде өтеді. Бұл күндері тақырыптық челлендждер, экологиялық акциялар және ұлттық ойындар бойынша жарыстар ұйымдастырылады.
