Шымкентте құны 25 миллиард теңгеден астам қаржыға салынған керамогранит зауыты іске қосылған болатын. Қазір онда 350 жұмысшы еңбек етіп жатыр.
Қытайлық Wan Sheng Ceramics компаниясы салған зауыт шетелдік компанияның қатысуымен «Жұлдыз» индустриалды аймағында ашылды. Бірінші кезеңі іске қосылған ірі инвестициялық жобаның құрамында керамогранит зауыты бар. Жобаның құны – 25,5 миллиард теңге. Кәсіпорынның жалпы алаңы 32 гектарды құрайды.
Бүгінгі таңда отандық керамогранит нарығының көлемі 35 миллион шаршы метрді құрайды. Жобаның бірінші кезеңін жүзеге асыру нарықтың қажеттілігін үштен біріне жабуға, яғни еліміздегі қажеттіліктің 34%-ын қамтамасыз етуге мүмкіндік береді. Ал, болашақта ішкі нарықты өзінің керамикалық плиткасымен толық қамтамасыз ету жоспарлануда.
Зауыттың құрылысы өткен жылы басталған. Бірінші кезеңді іске қосу аясында кәсіпорын жылына 12,7 миллион шаршы метр керамикалық плитка шығарады деп жоспарлануда. Екінші кезең іске қосылғаннан кейін өндірістік қуат екі есеге артып, 25,4 миллион шаршы метрге жетеді, тағы 350 жұмыс орны құрылады, зауыт құрылысы толық аяқталғанда, барлығы 700-ге жуық адам жұмыс істейді деп күтілуде.
Салынған зауыт Орталық Азия сияқты кең аймақтың құрылыс саласының ірі жобаларының біріне айналады. Мемлекет басшысы, Қазақстан Республикасының Президенті Қасым-Жомарт Тоқаевтың тапсырмаларының арқасында жобаны іске асыру кезеңдерінің әрқайсысында толық сүйемелдеу алды. Зауыттың ашылуы отандық нарықты керамикалық плиткалар сияқты жоғары сапалы құрылыс материалдарымен қамтамасыз етеді.
Жоба бойынша инвестициялардың жалпы сомасы 50 млн. доллар, қытайлық инвестор толық соманы берді, ал өнеркәсіп министрлігі Wan Sheng Ceramics-ке 32 гектар жер бөлді.
Бұған дейін қытайлық компаниялар «жасыл» энергетикаға инвестиция салуды қарастырып жатқаны хабарланған болатын. Атап айтқанда, Sany Group Co. Ltd Қазақстанда жел электр станцияларына арналған техника шығаратын зауыт сала алады, ал State Power Investment Corporation – бу-гидроэнергетикалық жобаларға және бу-газ турбиналарын салуға қатыса алады. Бүгінде компаниялар елімізде қуаты 1 ГВт болатын ірі жел электр станцияларын салып жатыр.