Бұдан бөлек, банктерге 30 күннен астам мерзімі өткен берешегі бар қарыз алушыларға жаңа несие беруге тыйым салынады. 19 наурыздан бастап ҚР-ның «Банктер және банк қызметі туралы» жаңа заңы аясында тұтынушылық несиелерді алушылар үшін жаңа талаптар енгізіледі.
30 күн мерзімі өткен несиелерді беруге тыйым салу бұрын алынған қарыздарды қайта құрылымдау процесіне қолданылмайды. Қазіргі уақытта Қазақстанда банктер мен МҚҰ-ларға қолданыстағы несиелері бойынша 90 күннен астам мерзімі өткен берешегі бар қарыз алушыларға жаңа тұтынушылық несие беруге тыйым салынған.
Сонымен қатар, 19 наурыздан бастап банктерге жеке тұлғаларға биометриялық аутентификацияны жүргізбей онлайн режимде несие беруге тыйым салынды.
Енді банктер алаяқтар ресімдеген несиелер үшін, егер қаржы ұйымының кінәсі немесе алаяқтық фактісі дәлелденсе, жауапты болады. Алаяқтардан зардап шеккенін растайтын сот актісі шығарылғаннан кейін, банк 10 күннен кешіктірмей зардап шеккен тұлғаның қарызын есептен шығарып, сондай-ақ оның бұрын енгізген ақшасын қайтаруға міндетті болады.
