Шымкент қаласы әкімдігінің Өңірлік коммуникациялар қызметінде қаладағы мемлекеттік тұрғын үй бағдарламаларының іске асырылуы жөнінде брифинг өтті. Іс-шараға Шымкент қаласы Тұрғын үй басқармасы басшысының орынбасары Көпжан Кенжеханұлы Тулебаев, «Отбасы Банк» АҚ Шымкент қаласы филиалы директорының орынбасары Еркін Бахытбекұлы Ахыншаев және БАҚ өкілдері қатысты. Брифинг барысында қалада мемлекеттік тұрғын үй бағдарламалары арқылы тұрғындарды баспанамен қамтамасыз ету жұмыстарының нәтижелері мен болашақ жоспарлар баяндалды.
БАСПАНА КЕЗЕГІНЕ 52 519 АЗАМАТ ТІРКЕЛГЕН
Қазіргі таңда Шымкент қаласы бойынша тұрғын үй алу кезегінде 52 519 азамат тіркелген. Олардың ішінде көпбалалы отбасылар, жетімдер мен ата-анасының қамқорлығынсыз қалған балалар, әлеуметтік жағынан осал топтар, мемлекеттік қызметшілер мен бюджеттік ұйым қызметкерлері, сондай-ақ апатты жағдайда тұрған тұрғын үйлері бар азаматтар бар. Осы категориялардың өкілдеріне баспана беру шаралары тұрақты түрде жүзеге асырылып келеді.
2024 жылы жыл соңына дейін 1 000 азаматқа арендалық пәтер беру жоспарланған, оның ішінде жетімдер мен ата-анасының қамқорлығынсыз қалған балаларға 200 пәтер, көпбалалы отбасыларға 351 пәтер, әлеуметтік осал топтарға 449 пәтер беріледі. Бүгінгі таңда 597 пәтер өз иелеріне табысталды, оның ішінде 136 пәтер жетімдер мен ата-анасының қамқорлығынсыз қалған балаларға, 288 пәтер көпбалалы отбасыларға, 173 пәтер әлеуметтік топтарға берілді.
ТҰРҒЫН ҮЙ СЕРТИФИКАТТАРЫ ЖӘНЕ «ҚАМҚОР» ӨҢІРЛІК БАҒДАРЛАМАСЫ
2025 жылдың 16 қаңтарынан бастап тұрғын үй сертификаттарына өтінім қабылдау басталғаны хабарланды. 500 млн. теңге көлемінде қайтарымсыз негізде тұрғын үй сертификаттарын беру жоспарлануда.
Тұрғын үй сертификаттары әлеуметтік көмек ретінде беріліп, қарыз сомасының 10%-ын, бірақ 1 000 000 теңгеден аспайтын мөлшерде ұсынылады.
Бұл сертификаттар бірінші және екінші топтағы мүгедектер, көпбалалы отбасылар, жетім балалар мен ата-анасының қамқорлығынсыз қалған балалар, «Алтын алқа», «Күміс алқа» иегерлері және басқа да әлеуметтік осал топтарға беріледі. Қазіргі таңда 103 азаматқа тұрғын үй сертификаты берілген.
Сонымен қатар, «Қамқор» өңірлік бағдарламасы аясында да тұрғындарға баспана берілуде. 2023 жылы бұл бағдарлама үшін 3 млрд. теңге бөлініп, 150 азамат пәтер алған. 2024 жылға 5 млрд. теңге бөлініп, 400 азаматқа пәтер берілуі жоспарланғаны айтылды.
Қатысушыларды іріктеу қорытындысы бойынша 1 736 өтінім қабылданып, оның ішінде 400 қатысушы негізгі тізімге енгізілген.
Спикерлердің мәлімдеуіншще, бұл бағдарлама аясында тұрғын үйге қол жеткізген азаматтардың саны жыл сайын артып келе жатыр.
ЖҰМЫС ІСТЕЙТІН ЖАСТАРҒА АРНАЛҒАН ТҰРҒЫН ҮЙ
Шымкент қаласында жұмыс істеп жүрген жастарға арналған тұрғын үй бағдарламасы үлкен сұранысқа ие. 2019 жылғы Қазақстан Республикасы Ақпарат және қоғамдық даму министрінің бұйрығына сәйкес, бүгінгі таңда жұмыс істеп жүрген жастарға сатып алу құқығынсыз 2 949 пәтер берілген.
Бағдарлама 2020 жылдан бастап іске қосылып, сол жылы 904 пәтер, 2021 жылы 300 пәтер, 2022 жылы 857 пәтер, 2023 жылы 888 пәтер ұсынылды.
Пәтерлер 5 жылға дейін беріледі (2023 жылдан бастап 3 жыл мерзімге).
«Бүгінгі таңда 900 пәтерге конкурс өткізіліп, құжаттандыру жұмыстары жүргізілуде. Жастарға арналған тұрғын үй бағдарламасы қалада жұмыс істейтін жас мамандарға қолжетімді баспана алу мүмкіндігін береді», — деді Шымкент қаласы Тұрғын үй басқармасы басшысының орынбасары Көпжан Кенжеханұлы.
