Мемлекеттік сатып алу порталында ерекше қызық тендер жарияланды. 2025 жылғы 31 шілдеде Мемлекеттік сатып алу порталында «Тірі африкалық зебра» атауымен лот пайда болды. Ұйымдастырушы: Шымкент қаласы мәдениет, тілдерді дамыту және архивтер басқармасының «Шымкент мемлекеттік зоологиялық саябағы» МКҚК.
Хайуанаттар бағы жалпы сомасы 14 040 000 теңгеге 6 зебра (2 еркек, 4 ұрғашы) сатып алғысы келеді. Яғни, африкалық Чапман зебрасының біреуі 2 340 000 теңгеге бағаланған.
Аталған лоттың техникалық ерекшелігінде зебраның жасына қатысты мынадай талаптар бар: «Туған жылы: 2022 жыл. Жасы: 1-ден 4 жасқа дейін».
Айта кетейік, «Тірі африкалық зебра» лоты Мемлекеттік сатып алу порталында жыл басынан бері төртінші рет – шілде айында төрт рет жарияланып отыр. Біріншісі – 1.07.2025 жылы, екіншісі – 11.07.2025 жылы, үшінші рет – 23.07.2025 жылы, төртіншісі – 31.07.2025 жылы. Алғашқы екі ретте лот Шымкент қаласы бойынша ішкі мемлекеттік аудит департаменті тарапынан тоқтатылған. Үшінші рет сатып алу өтпей қалған.
