Шымкент қаласында Еңбек мобильділігі орталығы жұмыссыз тұрғындарды жұмыс берушілердің сұранысы мен білім беру ұйымдарының ұсынысына сәйкес қысқа мерзімді кәсіптік оқытуға бағыттап келеді. Қазіргі таңда 26 оқу орталығында 597 азамат үш айлық кәсіптік білімін жетілдіруде.
Бүгін осы оқу орталықтары мен жұмыс берушілер арасында байқау өткізіліп, үздіктер анықталды. Байқауға қатысушылар өздерінің алған білімдері мен шеберліктерін ортаға салып, кәсіби дайындықтарын көрсетті.
Байқауға 9 оқу орталығының шәкірттері қатысты. Олар тігінші, аспаз, кондитер, шаштараз және маникюр мамандықтары бойынша шеберлігін ортаға салды. Тігіншілерге фартух тігу, аспаздарға паста тағамын әзірлеу, кондитерлерге вупипай тәттісін пісіру, шаштараздарға шаш үлгісін жасау, маникюр шеберлеріне тырнаққа күтім жасау және әрлеу тапсырмалары берілді.
Белгіленген уақыт ішінде қатысушылардың жұмыстарын қазылар алқасы бағалап, ең үздік орындаушыларды анықтады.
– Қатысушылардың Еңбек мобильділігі орталығы арқылы оқуға жолданғанына бір ай ғана болғанына қарамастан, қысқа мерзімде кәсіби дағдыларды қалыптастырғанына куә болдық. Биыл алғаш рет ұйымдастырылған бұл байқау білім алушыларға өз қабілеттерін көрсетуге, оқу орталықтары мен жұмыс берушілер арасында әріптестік орнатуға үлкен мүмкіндік береді, – деді Еңбек мобильділігі орталығы директорының орынбасары Бекболат Алиханов.
Байқау қорытындысы бойынша «Шебер тігінші» номинациясында – «Tumar textile» ЖШС оқу орталығы үздік атанды. «Кемеңгер аспаз», «Креативті кондитер», «Эксклюзивті шаштараз», және «Маникюр шебері» номинацияларында – «RECOMP» ЖШС оқу орталығының шәкірттері жеңімпаз болды.
Бұл шара жұмыссыз азаматтарды кәсіби тұрғыда дамытып қана қоймай, жұмыс берушілермен байланысты нығайтуға да бағытталған.
