«Түркістан облысы әкімдігінде салынатын нысандар мен ғимараттардың сәулеті арнайы кеңесте тұрақты түрде талқыланып тұрады. Сәулеттік кеңестің кезекті отырысында16 жоба талқыланды. Облыс әкімі Нұралхан Көшеров әрбір құрылыс нысаны терең зерделеніп барып салынуы керек екенін тағы да ескертті» деп хабарлады Түркістан облысы әкімінің баспасөз қызметі.
Облыс әкімі ұсынылған жобалардың бірқатарына ескерту айтып, толықтыру керектігін тапсырды.
– Нысандарды салмас бұрын оның орналасатын жерін, экономикалық тиімділігін, сәулетін терең зерделеу керек. Біз инвесторларды қолдаймыз, бірақ жобалар талапқа сай болуы тиіс. Жауапты мамандардың талқылауынан өткен соң ғана жобаларды жүзеге асыруға рұқсат беріледі, – деді Нұралхан Көшеров.
Кеңесте құрылыс нысаны салынатын аудан, қала әкімдерінің ұсыныстары тыңдалды. Жеке кәсіпкерлер де өз ойларын айтып, жобаларын ұсынды. Ұсынылған ірі жобалардың қатарында көрме орталығы, Қазақ-корей университеті, филармония, галерея салу туралы жобалар бар.
