Түркістан облысында шаруалар көктемгі дала жұмыстарын бастап жіберді. Егін егуді алғашқы болып бастаған шаруалардың бірі – Сарыағаш ауданы, Қабланбек ауылдық округінде орналасқан «Қалдан» шаруа қожалығы.
Түркістан облысының Өңірлік коммуникациялар қызметі таратқан мәліметке жүгінсек, шаруашылық биыл иелігіндегі 5 гектар жерге жоғарғы сұрыпты сәбіз егуде. Алдағы уақытта 2 гектар алқаптан 45 тонна өнім алуды жоспарлап отыр. Басқа да аудан шаруалары егістік жерлерін өңдеп, егіс егу жұмыстарына дайындық жүргізуде.
Биыл аудан бойынша 75,7 мың га егістік жерді игеру жоспарланған. Оның ішінде, дәнді және бұршақты дақылдар – 49,9 мың гектар, майлы дақылдар – 1,1 мың гектар, картоп – 2,03 мың гектар, көкөніс – 10,6 мың гектар, бақша өнімдері – 0,5 мың гектар, мал азығы – 11,6 мың гектар алқапқа орналастырылатын болады.
