Түркістан облысының әкімі Нұралхан Көшеров Сарыағаш ауданының тұрғындарымен кездесті. Облыс әкімі аймақтың әлеуметтік-экономикалық дамуын жақсарту жолындағы жұмыстарға тоқталып, жоспарларды атап өтті.
– Сарыағаш ауданында «Ауыл – Ел бесігі» жобасы аясында 2024 жылы 11 елді мекенде құны 3,5 млрд. теңгені құрайтын 20 жоба іске асырылды. Нəтижесінде 51 көшеге орташа жөндеу жұмыстары жүргізілді. 150 орынды кітапхана мен мəдениет үйі ел игілігіне берілді. Елді мекендерде спорт кешендерінің құрылысы аяқталып, пайдалануға берілді. «Ауыл аманаты» бағдарламасы аясында өткен жылы 309 млн. теңгеге 34 жоба қаржыландырылған, 2025 жылы 499 млн. теңгеге 42 жобаны қаржыландыру жоспарлануда, – деді облыс әкімі.
Өңір басшысының баяндауынша, ауданда «Дипломмен ауылға» бағдарламасы аясында 24 маманға 9 млн. теңгеге бір реттік көтерме жəрдемақы, 14 маманға тұрғын үй сатып алу үшін 103 млн. теңге көлемінде бюджеттік несие берілген. «Жайлы мектеп» жобасы аясында бір мектеп пайдалануға тапсырылған. Жалпы өңірлік өнім көлемі 25 пайызға, шағын және орта бизнес субъектілерінің саны 3 пайызға өскен.
– Инвестиция мен құрылыс жұмыстарының көлемі өскен. Өндіріс орындарын ашу бағытындағы жұмыс күшейтілуі тиіс, – деген Нұралхан Көшеров ауданның əлеуметтік-экономикалық даму көрсеткіштерін көтеру мақсатында арнайы қадамдық іс-шара жоспарын бекітіп, қысқа мерзімде нақты шараларды қабылдауды тапсырды.
Облыс әкімі тұрғындарды «Таза Қазақстан» бағдарламасын қолдауға шақырды.
Кездесуде Сарыағаш ауданының әкімі Арман Абдуллаев өткен жылы атқарылған жұмыстар мен алдағы жоспарлар жайында баяндады.
Жиын барысында тұрғындар облыс әкіміне көптен күрмеуі шешілмей жүрген түйткілді мәселелерін жеткізді. Білім, жол, кәріз жүйесі, инфрақұрылым, жерге қатысты өткір сұрақтар қойылды.
Кездесуден кейін Нұралхан Көшеров сарыағаштықтар үшін жеке қабылдау өткізді. Тұрғындар тарапынан көтерілген мәселелер бақылауға алынды.