Түркістан қаласында Тәуелсіздік күніне орай «Рәміздерді ұлықтайық» тақырыбында мазмұнды кездесу өтті. Аға буын мен жас буын қатысқан жиынды қалалық ішкі саясат бөліміне қарасты «Жастар ресурстық орталығы» КММ ұйымдастырды.
Кездесуге Түркістан қалалық ардагерлер алқасының төрағасы Құлбайымбет Жарқынбек, Түркістан қаласы әкімдігі Ішкі саясат бөлімінің маманы Айдос Байжан, қалалық жастар орталығының басшысы міндетін атқарушы Алия Пиржанова, Қазақстан студенттер альянсының Түркістан қалалық төрағасы Серікбай Ахмет сияқты беделді тұлғалар қатысты.
Бұл маңызды іс-шарада Мемлекеттік рәміздердің қадір-қасиеті, олардың ұлт тарихындағы орны және жас ұрпақты отаншылдыққа тәрбиелеудегі рөлі жан-жақты талқыланды.
Жиын барысында қатысушылар Мемлекеттік Ту, Елтаңба және Әнұранның тарихи мәнін, олардың елдік сананы қалыптастырудағы маңызды рөлін ерекше атап өтті. Сонымен қатар, жастарға бағытталған тәрбиелік мазмұндағы ойларымен бөлісіп, өздерінің тәжірибелері мен білімдерін ортаға салды. Ардагерлер мен жастар арасындағы ашық пікір алмасу, ұрпақтар сабақтастығының жарқын көрінісі ретінде ерекшеленді. Бұл кездесу жастардың өз елінің рәміздеріне деген құрметін арттырып, отаншылдық сезімдерін нығайтуға бағытталған маңызды қадам болды.
Кездесу Тәуелсіздіктің құндылығын терең сезіндіріп, қатысушылардың отаншылдық рухын көтерген ерекше шараға айналды. Мемлекеттік рәміздерді дәріптеу арқылы жас ұрпақтың патриоттық тәрбиесін күшейту – бүгінгі күннің өзекті мәселесі екендігі айқын көрінді.
