Бірлігі жарасқан еліміз өзінің тағы да бір асқаралы кезеңі – Қазақстан халқы Ассамблеясының 30 жылдық мерейтойына үлкен табыстармен келіп отыр. Бұл турасында Мемлекет басшысы Қасым-Жомарт Кемелұлы Тоқаев Қазақстан халқы Ассамблеясының «Бірлік. Жасампаздық. Өрлеу» атты ХХХІІІ сессиясында сөйлеген сөзінде: “Ассамблея – ел бірлігін іс жүзінде орнықтыра түсетін тиімді құрылым. Бүгінде бұл – конституциялық мәртебесі бар маңызды қоғамдық орган. Ассамблея өте ауқымды қайырымдылық шараларын дер кезінде және жедел ұйымдастырып келеді. Мұның бәрі көп жылдық жүйелі жұмыстың нәтижесі екені сөзсіз”, – деп атап көрсеткен болатын.
Қазақстан халқы Ассамблеясының салтанатты 30 жылдық мерейтойы аясында республикамызда сан алуан танымдық, ғылыми басқосулар, конференциялар, “дөңгелек үстел” мәжілістері сияқты ғылыми талдамалар жасау, ел дамуындағы Ассамблеяның орны мен атқарған қызметі туралы пікір алмасу алаңдары көптеп өткізіліп жатыр. Сондай айтулы іс-шараның бірі М.Әуезов атындағы Оңтүстік Қазақстан университетінде өтті. «Ұлтаралық татулық пен ынтымақтастық – негізгі құндылығымыз» атты іс-шарада ұлтаралық татулықты нығайту жолдарының ғылыми-теориялық негіздерін көпшілік сипатта дәлелдеу, Қазақстан қоғамында этностар арасындағы бейбітшілік пен өзара құрметті насихаттаудың теориялары мен әдістемелерін жасау, әртүрлі этнос өкілдері арасындағы келісімді сақтау және дамыту жолдары талқыланды.
“Дөңгелек үстел” басында, сонымен қатар, этнопсихология ғылымдарының жаңалықтары ортаға салынып, этнос өкілдері арасындағы байланысты дамытудағы мемлекеттік тілдің маңызы мен ролі, Қазақстанның көпұлтты қоғамында ынтымақтастықтың негізгі құндылық ретіндегі рөлін айқындау жайы сөз болды.
Жиында бірлік пен тұрақтылықты сақтаудағы әр этностың үлесі атап өтіліп, Ассамблеядағы жастардың рөлін анықтау мақсатында азаматтар арасындағы толеранттылық, достық және өзара түсіністік құндылықтарын ілгерілетудің әдістемелік негізі мен жолдарын анықтау, болашақ ұрпаққа этносаралық келісімнің маңызды екенін түсіндіру жолдары мен формаларын негіздеу сияқты келелі мәселелер айтылды.
“Дөңгелек үстел” мәжілісіне 2 ғылым докторы, профессорлар, 10-ға жуық ғылым кандидаттары, 6 магистр, Шымкент қаласндағы екі этномәдени бірлестіктің төрағалары, «Қоғамдық келісім» мекемесінің мамандары мен студенттер қатысты.
ҚХА кафедраларының республикалық «Шаңырақ» қауымдастығының төрайымы, Л.Н. Гумилев атындағы ЕҰУ ҚХА кафедрасының меңгерушісі, саяси ғылымдардың докторы Калашникова Наталья Павловна жиын қатысушыларын ZOOM жүйесі арқылы ҚХА-ның 30 жылдығымен құттықтап, М.Әуезов университетінің қызметіне өте жоғары баға бере келе, қауымдастық атынан шынайы ризашылығын білдірді.
Ия, шындығына келер болсақ, оқу орнымыз Ассамблеяның идеялары мен бағдарламаларын қолдай отырып, білім алушылар арасында достық, толеранттылық және өзара құрмет мәдениетін қалыптастыруға ерекше назар аударып келеді. Қазіргі таңда университетте түрлі этнос өкілдерінен құралған 400-дей профессор-оқытушылар еңбек етіп, 2000-ға жуық студент білім алып жүр. Осындай үлкен көпэтносты білім ордасында ұйымдастырушылық қызмет көрсету үшін «Қазақстан халқы Ассамблеясы» кафедраларының «Шаңырақ» атты республикалық қоғамдық қауымдастығына мүшелікке енген арнайы «Тұлға дамыту және ҚХА» орталығы жұмыс жасауда.
“Ұстаздан шәкірт озады” дегендей, оқу ордамыздың осынау тамаша дәстүрін бойына сіңірген жастарымыз дипломдарын қолдарына алғаннан кейін кең-байтақ еліміздің түкпір-түкпірінде өз орындарын тауып, халыққа қалтқысыз қызмет етіп жүр. Солардың арасында бірегейлері – Сенат депутаты, тарих мамандығының түлегі Сатвалдиев Әлішер Гапиржанович, 8-ші шақырылған Парламент Мәжілісінің депутаты Рожин Максим Николаевичті айта кетуіміз қажет.
Қазақстан – бейбітшілік пен бірліктің нышанына айналған ел. Өйткені, басты байлығымыз – мультимәдениетті елдің ішкі татулығы мен бірлігі. Әртүрлі этнос өкілдерінің бір шаңырақ астында өзара түсіністік пен құрметке негізделген қарым-қатынас құруы – қоғамның басты құндылығы. Әрқайсымыздың мақсатымыз – осы құндылықтарды болашақ ұрпаққа жеткізу, қоғамдағы тұрақтылық пен бірлікті сақтау болса, өткізілген “дөңгелек үстел” мәжілісінің барысында оған қатысушылар осы маңызды ойды өз санасына түйіп алғандығы сөзсіз.
Г. ЖАНЫСБЕКОВА,
тарих ғылымдарының кандидаты, М.Әуезов атындағы ОҚУ-дың
«Тұлға дамыту және ҚХА» орталығының басшысы.
