Жетісай ауданында «Жұмыс күшінің мобильділігін арттыру үшін ерікті түрде қоныс аударуға жәрдемдесу» бағыты шеңберінде «Қоныс аудару» жәрмеңкесі өтті.
Жәрмеңкеге ҚР Еңбек және халықты әлеуметтік қорғау министрлігі Көші-қон комитетінің төрағасы Әсет Шонов, облыстық «Еңбек мобильділігі орталығы» КММ директоры Абзал Қазанқапов, аудан әкімінің орынбасары Нұркен Әлмеш қатысты. Сондай-ақ, жәрмеңкеге Солтүстік Қазақстан мен Шығыс Қазақстан, Абай, Павлодар, Қарағанды, Ұлытау мен Қостанай облыстарынан келген делегация мүшелері қатысты.
Кездесуде теріскей аймақтардың жай-күйі, жергілікті азаматтардың тыныс-тіршілігі таныстырылды. Одан бөлек, тұрғын үй мен егістік жер алу, жұмысқа тұрғызу, шағын және орта бизнесті дамытуға ниеттілер үшін салықтық жеңілдіктер жайлы айтылды.
Іс-шара соңында Жетісай ауданынан 11 адам Павлодарға, 10 адам Солтүстік Қазақстанға, 5 адам Қарағандыға, 4 адам Қостанайға, 3 адам Шығыс Қазақстанға, 3 адам Ұлытауға, 2 адам Абай облыстарына қоныс аударуға ниет білдірді.
