Шардара ауданының әкімі Қайрат Жолдыбай әлеуметтік желі арқылы бүкіл елге танылып үлгерген 4 жасар математик Ислам Қанатбекұлын қабылдады.
Аудандағы 60 жылдық ауылында тұратын жас математик әлеуметтік желіде есепке жүйрік қасиетімен көпшілікті таңдай қақтырған болатын. Әлеуметтік желілерде тараған видео бір күн үшінде миллиондаған қаралым жинады. Ислам ондықтар мен мыңдықтарды еркін алып-қоса алады, көбейту кестесін де біледі.
— Адамның қалыптасуы бала кезден басталады. Соның бір дәйегі — біздің 4 жасар бүлдіршініміз Ислам Қанатбекұлы әлеуметтік желіде дүйім елді өзіне қаратып, ауданымыздың атын асқақтатып жатыр. Осындай дарын иесін әлеуметтік желіге жүктеп, кішкене ғана Исламды елге танытып жатқан біздің Шадияр мен Мейіржанға да рахмет айтамыз, — деді Қ. Жолдыбай.
Қайрат Жолдыбай бұл күні түрлі сайыстар мен жобалардың үздігі атанған дарынды оқушыларды да қабылдады. Аудан әкімі жас дарынды оқушылардың «El umiti» бастамасын іске асыру аясында елімізде талантты жастарды қолдауға бағытталған жоба туралы да пікірін білдірді.
– «Балалар жылы» аясында Түркістан облысының адами әлеуетті дамыту басқармасы мен «Turkistan TV» телеарнасының ұйымдастыруымен өткізілген «Күлтегін» зияткерлік ойынына қатысып, үлкен марапаттарға ие болды. Жаны таза, пейілі ақ өздеріңдей талантты жастардың ауданымызда өсіп келе жатқаны біздің көңілімізге қуаныш сыйлайды, — деді Қ.Жолдыбай.
Жиын соңында аудан әкімі оқушыларға ризашылығын жеткізіп, өз атынан Алғыс хат пен бағалы сыйлықтар табыстады.
Narkesken.kz