Түркістан облысында 109 байланыс орталығына жыл басынан бері 11 358 қоңырау түскен. Олардың 71,4%-ы кеңес беру, 28,5%-ы оқиға ретінде тіркелген. Қоңыраулардың басым бөлігі электрмен жабдықтау, сумен қамтамасыз ету, ветеринарлық қызмет, көшені жарықтандыру, тұрмыстық қалдықтарға қатысты түскен. Ал, өткен жылы 130 224 қоңырау тіркеліп, халықпен кері байланыс орнатылған. Бұл туралы облыс әкімдігінде өткен аппарат мәжілісінде айтылды.
Облыс әкімі Нұралхан Көшеров жауапты тұлғаларға халық ұсынысына құлақ аса отырып, инфрақұрылым жүйелерін жетілдіруді, абаттандыру жұмыстарын сапалы атқаруды тапсырды.
Облыстық цифрландыру, мемлекеттік қызметтер көрсету және архивтер басқармасының басшысы Марат Айнабеков байланыс орталығында атқарылған жұмыстар туралы есеп беріп, алдағы жоспарларды баяндады. Оның айтуынша, Мемлекет басшысы Қасым-Жомарт Тоқаевтың «Халық үніне құлақ асатын мемлекет» тұжырымдамасын іске асыру мақсатында Түркістан облысында 109 бірыңғай байланыс орталығы тәулік бойы тұрғындардан түсетін қоңырауларды қабылдайды.
Жиында басқарма басшысы 109 желісінің жұмысына жасанды интеллект мүмкіндіктерін (AI) қолдану жоспарын таныстырды.
«Бұл өтініштердің сапалы орындалуын арттырады және мәселелердің тез әрі тиімді шешілуіне ықпал етеді» деді басқарма басшысы.
