Шымкентте қазақтың қасиетті сөз өнерін дәріптеген дәстүрлі «Күміс домбыра» республикалық жас ақындар айтысы өтті. Мегаполисте бесінші рет өткен биылғы айтыс ұлт руханиятының жанашыры, түркітанушы ғалым Бейсенбай Кенжебаевтың 120 жылдығына арналды. Жыр додасына еліміздің түкпір-түкпірінен 16 жас қатысты.
Айтыстың әділдігін ҚР Парламент Мәжілісінің депутаты, белгілі айтыскер ақын Аманжол Әлтаев, айтыстың арыстаны атанған Бекарыс Шойбеков бастаған қазылар алқасы қадағаласа, киелі өнердің мегаполисте дәстүрлі түрде ұйымдастырылып тұруына басты себепкер болған Біржан Байтуов бастаған «Қаратау» өнер мектебінің ұжымы. Айтыс Шымкент қаласы әкімдігінің қолдауымен өтті.
Қатысушылар 4 айналым бойынша жеребе тарту арқылы жұптасып, өнер көрсетті. Қазылар алқасының шешімімен бас жүлде – күміспен қапталған домбыра мен 1 000 000 теңге қаржылай сыйақы Қарағанды облысынан келген жас ақын Нұрмұхаммед Байсүгірге бұйырды. Ол Астана қаласында өтетін «Алтын домбыра» сайысына жолдама алды. Оның өткір ойлары, ұтымды теңеулері, әзілі жарасқан шумақтары қазылар алқасы мен көрерменді тәнті етті.
Шымкент қаласының намысын қорғаған 12 жасар Ислам-Али Біржанұлы ерекше дарынымен көзге түсіп, 1-орынды, Павлодар облысынан келген Ибраһим Қазыбек пен Абай облысының тумасы Айбек Жеңісқазин 2-орынды иеленді.
