Ауылдарды дамыту — елдің әлеуметтік-экономикалық тұрақтылығы мен ұзақ мерзімді өсімінің негізгі бағыттарының бірі. Мемлекет басшысы Қасым-Жомарт Тоқаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында ауылды өркендету, инфрақұрылымды жаңғырту және халықтың өмір сүру сапасын жақсарту мәселесіне ерекше назар аударылған болатын. Осы тапсырмаға сәйкес іске асырылып жатқан «Ауыл – Ел бесігі» арнайы жобасы елді мекендердің әлеуметтік және инженерлік инфрақұрылымын жаңғыртуға бағытталды.
Түркістан облысында бұл бастама нақты нәтижелерге қол жеткізіп, ауылдардың дамуына серпін берді. 2019-2025 жылдары жоба аясында 136,5 млрд теңгеге 1 570 жоба жүзеге асырылды. Бұл қаржы ауыл ішіндегі жолдарды жөндеуге, инженерлік желілерді тартуға, әлеуметтік нысандарды салу мен қайта жаңғыртуға жұмсалды. Нәтижесінде өңірдің 373 елді мекенінде, яғни 1 миллионнан астам тұрғын үшін өмір сүруге қолайлы жағдай жасалды.
Инженерлік инфрақұрылымды жаңғырту
«Ауыл – Ел бесігі» жобасы тек жекелеген нысандарды жөндеумен шектелмей, ауылдық аумақтың өмір сүру ортасын кешенді түрде жақсартуға бағытталды. Түркістан облысында осы бағытта 1 404 инфрақұрылымдық нысанның құрылыс-жөндеу жұмыстары жүргізілді. Бұл ауыл ішіндегі көлік қатынасын жақсартуға, коммуналдық қызметтердің тұрақтылығын арттыруға және тұрғындардың күнделікті тұрмысын жеңілдетуге мүмкіндік берді.
Атап айтқанда, 2 421,3 шақырым ішкі көшелер орташа жөндеуден өтті. Бұл ауыл ішіндегі қозғалыс қауіпсіздігін жақсартып қана қоймай, әлеуметтік нысандарға, мектептерге, медициналық мекемелерге және өндірістік аумақтарға қолжетімділікті арттырды. Сонымен қатар 38 елді мекен газбен қамтылды, 6 елді мекенде су жүйелерінің құрылыс-жөндеу жұмыстары жүргізілді, 49 елді мекен сапалы электрмен қамтылып, жылу жүйелері қайта жаңғыртылды.
Әлеуметтік нысандардың жаңаруы
Жобаның маңызды бөлігі – ауыл тұрғындарына қызмет көрсететін әлеуметтік нысандарды дамыту. Түркістан облысында 166 әлеуметтік нысанның құрылыс-жөндеу жұмыстары жүргізіліп, пайдалануға тапсырылды. Бұл ауылдағы білім беру, мәдениет, спорт және денсаулық сақтау салаларының сапасын арттырды.
Мәдениет саласында 25 мәдениет үйі салынып, 16 мәдениет үйі күрделі жөндеуден өтті. Мұндай нысандар ауыл тұрғындарының бос уақытын тиімді өткізуіне, мәдени іс-шаралар ұйымдастыруына және жас ұрпақтың шығармашылық әлеуетін дамытуына жағдай жасайды.
Спорт инфрақұрылымы да назардан тыс қалған жоқ. 22 спорт кешені салынды, 3 спорт ғимараты күрделі жөндеуден өтіп, 1 стадион қайта жаңғыртылды. Бұл ауыл жастарының спортпен тұрақты айналысуына мүмкіндік беріп, салауатты өмір салтын насихаттауға ықпал етті.
Білім беру бағытында 65 мектеп күрделі жөндеуден өтіп, 13 мектепке қосымша ғимараттар салынды. Мұндай жұмыс ауыл оқушыларының сапалы білім алуына қолайлы жағдай туғызды. Денсаулық сақтау саласында 13 фельдшерлік-акушерлік пункт салынып, 8 денсаулық сақтау нысаны күрделі жөндеуден өтті. Бұл алғашқы медициналық көмектің қолжетімділігін арттырып, ауыл тұрғындарының қауіпсіздігін нығайтты.
Экономикалық және әлеуметтік әсері
Түркістан облысында «Ауыл – Ел бесігі» жобасы аясында жүзеге асқан жобалар ауыл экономикасына да оң ықпал етті. Жобаларды орындау барысында 11 мыңнан астам жұмыс орны ашылды. Бұл, бір жағынан, халықты уақытша және тұрақты жұмыспен қамтуға мүмкіндік берсе, екінші жағынан жергілікті еңбек нарығын жандандыруға әсер етті.
Жалпы 7 жыл ішінде Түркістан облысында 260 әлеуметтік және инженерлік инфрақұрылым нысандары салынып, 2 421 шақырым жол жөнделді. Бұл ауыл тұрғындарының тұрмыс сапасын арттыруға, жастардың елді мекендерде қалуына, көші-қон үдерісін тежеуге және жергілікті экономиканың дамуына негіз қалады.
Ауыл инфрақұрылымының дамуы кәсіпкерлік үшін де қолайлы орта қалыптастырады. Жақсы жол, тұрақты электр, газ және су жүйелері шағын және орта бизнесті дамытуға мүмкіндік береді. Соның нәтижесінде салықтық түсімдер көбейіп, өңірлік бюджеттердің кіріс әлеуеті артады. Бұл, өз кезегінде, жаңа жобаларды іске асыруға жол ашады.
Түркістан облысындағы бұл тәжірибе ауылды дамытуға бағытталған мемлекеттік саясаттың нақты және өлшенетін нәтижелер бере алатынын көрсетті.
