Бүгін Түркістан қаласындағы Karavansaray Turkistan туристік кешенінде өңір кәсіпкерлері, инвесторлар және сауда саласына қызығушылық танытқан қатысушылар үшін бизнес-тур ұйымдастырылды. Іс-шараның мақсаты – кәсіпкерлерге кешеннің туристік және коммерциялық әлеуетін таныстыру, жаңа бизнес мүмкіндіктерін ашу және өңірдегі кәсіпкерлік экожүйені дамытуға қолдау көрсету болды.
Karavansaray Turkistan кешенінің Бас директоры Мурат Онан өз сөзінде кешеннің даму перспективаларына тоқталып, оның тек туристік бағытта ғана емес, сонымен қатар бизнес пен коммерциялық серіктестіктерді дамытуда да маңызды рөл атқаратынын атап өтті. Ол кешеннің кәсіпкерлерге арналған инфрақұрылымы мен қолайлы жағдайлары туралы толық ақпарат берді.
Түркістан облысы Кәсіпкерлер палатасының директоры Аслан Ибадуллаев өңірдегі кәсіпкерлік экожүйенің қарқынды дамып келе жатқанын атап, Karavansaray Turkistan-ның өңірдің бизнес әлеуетін арттырудағы маңыздылығын ерекше атап өтті.
«Karavansaray Turkistan — өңірдің бизнес әлеуетін арттыруда маңызды орталық. Мұнда кәсіпкерлер үшін жаңа дүкен ашуға, өнімдерін көрсетуге немесе қызметтерін жүзеге асыруға барлық жағдай жасалған. Біздің міндетіміз — бизнеске қолдау көрсету және олардың идеяларын жүзеге асыруға көмектесу», — деді Кәсіпкерлер палатасының директоры.
Іс-шара барысында қатысушыларға кешеннің инфрақұрылымына арналған бейне-материал көрсетіліп, оның туристік және коммерциялық әлеуеті жан-жақты таныстырылды. Сондай-ақ, жалға алу шарттары мен арнайы ұсыныстар, сауда нүктелерін орналастыруға арналған мүмкіндіктер, келушілер легі және тиімді локациялар туралы толық ақпарат берілді. Табысқа жеткен жобалардың мысалдары арқылы қатысушыларға нақты тәжірибе ұсынылды.
Бизнес-турдың маңызды бөлігі ретінде бос орындарға инфо-тур ұйымдастырылып, қатысушылар Karavansaray Turkistan кешенінің аумағындағы сауда нүктелерін, бос коммерциялық орындарды және кеңсе ретінде пайдалануға болатын локацияларды аралады. Әр аймақтың орналасу ерекшеліктері, келушілер ағыны, маңайындағы қызмет түрлері және бизнес жүргізуге қолайлы факторлар туралы толық түсінік алды. Кешен мамандары әр локацияның аудиториясына сәйкес қандай өнімдер мен қызмет түрлері тиімді болатынын, дүкенді орналастыру кезінде нені ескеру керектігін нақты мысалдармен баяндады. Бұл инфо-тур кәсіпкерлерге өз бизнес-идеяларын кешеннің нақты жағдайларына бейімдеуге және тиімді шешімдер қабылдауға көмектесті.
Шара соңында ұйымдастырылған кофе-брейк кезінде кәсіпкерлер сарапшылармен жеке консультациялар өткізіп, өз жобалары бойынша сұрақтарын қойып, әріптестік мүмкіндіктерін белсенді түрде талқылады. Бұл кездесулер жаңа байланыстар орнатуға, тәжірибе алмасуға және болашақ ынтымақтастық жолдарын айқындауға мүмкіндік берді.
Karavansaray Turkistan бизнес-турына қатысу тегін болды, бұл өңір кәсіпкерлеріне жылына 2,5 миллионнан астам турист қабылдайтын осындай ауқымды кешеннің мүмкіндіктерімен жақыннан танысуға тамаша мүмкіндік берді.
Іс-шараның қорытындысы бойынша қатысушылар кешеннің бизнес әлеуетіне жоғары баға беріп, мұнда жаңа кәсіп ашуға немесе бар бизнесін кеңейтуге деген қызығушылықтарын білдірді. Бұл бизнес-тур Түркістан облысының кәсіпкерлік белсенділігін арттыруға және өңірдің экономикалық дамуына ықпал ететін маңызды қадам болды.
