Шетелде тұратын этникалық қазақтар тарихи Отанына оралып, қандас мәртебесін ала алады. Алайда Қазақстанға қоныс аудару үшін белгілі бір тәртіп пен талаптарды орындау қажет. Қандас мәртебесін алу, мемлекеттік қолдауға ие болу және тұрақты тұруды рәсімдеу бірнеше кезеңнен тұрады.
Қазақстанға көшуді жоспарлаған азаматтар мына қадамдарды білуі керек.
- Қоныс аударатын өңірді таңдау
Алдымен Қазақстанның қай өңіріне қоныс аударатыныңызды анықтау қажет. Қазіргі тәртіп бойынша қоныс аудару үшін жеті өңір белгіленген. Өңірді таңдағанда ондағы тұрмыс жағдайын, жұмыс орындарының қолжетімділігін және отбасылық қажеттіліктерді ескерген жөн.
- ҚАЗТЕСТ сынағынан өту
Келесі кезеңде testcenter.kz сайты арқылы қазақ тілін меңгеру деңгейін анықтайтын ҚАЗТЕСТ сынағынан өту қажет.
Тест 60 сұрақтан тұрады. Тыңдалым және оқылым бөлімдерінің әрқайсысы бойынша кемінде 70 пайыз дұрыс жауап беру талап етіледі.
- Сауалнама толтыру
Үміткер өзінің білімі, еңбек өтілі, кәсіби дағдылары, тілдерді меңгеру деңгейі, денсаулық жағдайы және отбасы құрамы туралы мәліметтерді көрсетеді.
Осы ақпарат негізінде үміткердің мүмкіндіктері мен әлеуетін бағалайтын балдық жүйе (скоринг) жүргізіледі.
- Мемлекеттік тексеруден өту
Өтініш беруші ұсынған мәліметтер арнайы және құқық қорғау органдары тарапынан тексеріледі.
- Сұхбаттасу
Тексеру кезеңінен кейін үміткермен сұхбат өткізіледі. Оның қорытындысы бойынша тиісті шешім қабылданады.
- Қандас мәртебесін алу
Бағалау кезеңінен сәтті өткен азамат қандас мәртебесін алу үшін тиісті өтініш бере алады.
- Мемлекеттік қолдауға ие болу
Өңірлік квотаға енгізілген жағдайда қоныс аударушыларға мемлекеттік қолдау шаралары қарастырылған. Олардың қатарында көшуге, тұрғын үйді жалға алуға және коммуналдық қызметтерді төлеуге арналған субсидиялар бар.
- Жаңа ортаға бейімделу
Қазақстанға қоныс аударған азаматтарға бейімделу және қоғамға кірігу мәселелері бойынша мамандандырылған орталықтар көмек көрсетеді.
Олар құжаттарды рәсімдеу, жұмысқа орналасу, балаларды балабақша мен мектепке орналастыру сияқты мәселелерді шешуге жәрдемдеседі.
- Тұрақты тұруды рәсімдеу
Қазақстанда тұрақты тұруды жоспарлаған азаматтар алдымен тұрақты тұруға рұқсат алуы керек. Одан кейін тұруға ықтиярхат рәсімделеді.
Қоныс аударуды алдын ала жоспарлаған жөн
Қазақстанға көшуді ойлаған этникалық қазақтар қажетті құжаттарын алдын ала дайындап, белгіленген талаптармен танысқаны дұрыс. Әр кезеңнің тәртібін сақтау құжат рәсімдеу кезінде туындауы мүмкін қиындықтардың алдын алуға көмектеседі.
