Сайрам ауданы, өзінің стратегиялық географиялық орны, халықтың тығыздығы және жұмыс күшінің молдығымен ерекшеленеді. Бұл факторлар өңірде жаңа индустриалды аймақ ашудың қажеттілігін айқын көрсетеді. Осы мақсатта аудан әкімі Мадияр Оразалиев жеке инвестор Тасқынбай Бұрлыбаевпен кездесіп, Қайнарбұлақ ауылдық округі аумағында «ТАТА» индустриалды аймағын құру жобасын талқылады.
Батыс Еуропа – Батыс Қытай халықаралық дәлізінің бойында орналасатын бұл индустриалды аймақ 21 гектар аумақты алып, жалпы құны 5 миллиард теңгеге бағаланады. Бұл жоба Мемлекет басшысы Қасым-Жомарт Тоқаев пен облыс әкімі Нұралхан Көшеровтің инвесторларға қолайлы жағдай жасау жөніндегі тапсырмалары аясында Сайрам ауданы үшін стратегиялық маңызға ие.
Аудан аумағында дайын индустриалды аймақтың болуы шетелдік және отандық инвесторларды тартуды айтарлықтай жеңілдетеді. Инженерлік инфрақұрылымы толық қамтамасыз етілген, өндіріс алаңдары дайын аумаққа келуге ниетті кәсіпкерлер үшін бұл – үлкен мүмкіндік. Бұл жаңа аймақ кәсіпкерлерге өз бизнесін дамытуға, жаңа технологияларды енгізуге және өндірістік қуатты арттыруға жағдай жасайды.
Индустриалды аймақтың ішінде жұмысшыларға арналған жатақхана, әлеуметтік-тұрмыстық нысандар, мешіт және басқа да қажеттіліктер қарастырылған. Бұл жұмысшылардың жайлы өмір сүруі мен жұмыс істеуіне жағдай жасайды. Заманауи талаптарға сай салынатын бұл аумақта жиһаз шығаратын өндіріс орны, техника құрастыратын зауыт орналастыру жоспарда бар. Бұл өз кезегінде жаңа жұмыс орындарын құрып, аудан экономикасын жаңа деңгейге көтеруге ықпал етеді.
Сайрам ауданы үшін индустриалды аймақ – тек құрылыс жобасы емес, өңірдің өндірістік әлеуетін күшейтіп, инвесторлар үшін тартымды орталық қалыптастыратын маңызды қадам. Ауданның қолайлы логистикасы мен адами капиталы мұндай бастаманы жүзеге асыруға толық мүмкіндік береді.
Жаңа индустриалды аймақтың құрылысы Сайрам ауданының экономикалық өсіміне серпін береді. Бұл жоба ауданның бюджетін толықтырып, халықтың әл-ауқатын жақсартуға ықпал етеді. Сонымен қатар, индустриалды аймақ ауданның инвестициялық тартымдылығын арттырып, жаңа технологиялар мен инновацияларды енгізуге мүмкіндік береді.
Сайрам ауданындағы индустриалды аймақ – бұл болашаққа бағдарланған қадам. Бұл жоба өңірдің экономикалық дамуын қамтамасыз етіп, халықтың өмір сүру сапасын жақсартуға бағытталған. Индустриалды аймақтың құрылысы Сайрам ауданын Қазақстанның жетекші өндірістік орталықтарының біріне айналдыруға мүмкіндік береді.
