Қазақстан Республикасында маңызды қоғамдық-саяси науқандарға дайындық жұмыстары жүйелі түрде жалғасуда. Осы орайда, Шардара қаласындағы «Шардара аудандық № 2 балалар мен жасөспірімдер спорт мектебінің» ғимаратында Шардара аудандық аумақтық сайлау комиссиясының ұйымдастыруымен ауқымды оқыту-семинары өткізілді. Аталған жиын 2026 жылғы 23 тамызға тағайындалған Қазақстан Республикасы Құрылтайы депутаттарының сайлауын жоғары деңгейде өткізу мақсатында қолға алынды.
Іс-шараға №849, №850, №851, №852, №853, сондай-ақ №904 және №905 учаскелік сайлау комиссияларының мүшелері толық қатысып, алдағы науқанға қатысты кәсіби біліктіліктерін арттырды. Семинарды Шардара аудандық аумақтық сайлау комиссиясының төрағасы С.Кошалиев пен комиссия мүшесі Р.Бекмуратов жүргізіп, негізгі баяндамалар жасады. Баяндамашылар алдағы сайлау науқанының басты ерекшеліктеріне тоқталып, сайлау заңнамасына енгізілген жаңалықтарды жан-жақты түсіндірді.
Жиын барысында учаскелік комиссия мүшелерінің жұмысын ұйымдастырудың маңызды бағыттары пысықталды. Атап айтқанда, сайлаушылар тізімдерімен жұмыс істеу тәртібі, дауыс беру күні азаматтардың құқықтарын қамтамасыз ету шарттары, дауыс беру үдерісін ұйымдастыру ережелері және түпкілікті қорытындыларды шығару жолдары нақты баяндалды. Теориялық мәліметтермен қатар, қатысушыларға арнайы кейстік тапсырмалар беріліп, олардың тәжірибелік дағдылары шыңдалды. Семинар соңында комиссия мүшелері өздерін толғандырған сауалдарын қойып, мамандардан толыққанды және тұшымды жауаптар алды.
