Түркістан – қасиетті қала, тарихы терең, рухани байлығы мол мекен. Соңғы жылдары бұл ежелгі шаһар жаңа серпінмен, қарқынды дамумен ерекшеленіп, заманауи инфрақұрылым мен көркем абаттандырудың үлгісіне айналуда. Қаланың әр бұрышында жаңа құрылыстар бой көтеріп, бұрынғы көріністер жаңаша сипат алып, Түркістанды туристер мен жергілікті тұрғындар үшін тартымды орынға айналдыруда.
Түркістан қаласының әкімі Әзімбек Пазылбекұлы қала аумағында жүргізіліп жатқан құрылыс және абаттандыру жұмыстарының барысын тексеріп, нысандарды аралады. Бұл сапар қаланың инфрақұрылымын дамыту мен тұрғындардың өмір сүру сапасын арттыруға бағытталған маңызды жобалардың орындалуын қамтамасыз ету мақсатында өтті.
Әкім алдымен «Жібек жолы» тұрғын үй кешенінің құрылыс алаңында болды. Жалпы аумағы 5,2 гектарды құрайтын бұл жобада арендалық және кредиттік тұрғын үйлердің құрылысы жүргізілуде. Жоба аясында 6 арендалық үй, 512 пәтер және 3 кредиттік үй салынуда. Қазіргі таңда құрылыс жұмыстарының орындалу деңгейі 75 пайызға жеткен. Әзімбек Пазылбекұлы құрылыс сапасына ерекше назар аударып, жұмыстарды мерзімінде және жоғары сапада аяқтаудың маңыздылығын атап өтті.
Сонымен қатар, қала басшысы 26-шы көше бойындағы аяқжол құрылысының барысымен танысты. Мұнда жол төсесін дайындау, жиектастар орнату, бетондау және ішкі бөлікке тас төсеу жұмыстары белсенді жүргізілуде. Әкім тұрғындардың қауіпсіздігі мен жайлылығын қамтамасыз ету үшін жұмыстар сапасын арттыруды тапсырды. Бұл аяқжолдар қала тұрғындарының қала ішінде еркін және қауіпсіз қозғалуына мүмкіндік береді.
Аралау барысында қала әкімі қалалық прокуратура ғимаратының құрылыс алаңына да барып, құрылыс-монтаж жұмыстарының барысын тексерді. Жауапты мердігерлерге жобаны уақытылы әрі сапалы аяқтау бойынша нақты міндеттер жүктелді. Бұл ғимараттың құрылысы қаланың әкімшілік инфрақұрылымын нығайтуға ықпал етеді.
Әзімбек Пазылбекұлы 5000 орындық мешіт аумағындағы абаттандыру жұмыстарымен де танысты. Мұнда көгалдандыру, жарықтандыру және аумақты көркейту шаралары жүргізілуде. Мешіт аумағының абаттандырылуы қала тұрғындары мен қонақтары үшін рухани демалыс орнының көркін аша түседі.
Сапар соңында Әзімбек Пазылбекұлы Хақназар хан және Ш.Ниязов көшелеріндегі жабық футбол алаңдарының құрылыс жұмыстарын көрді. Қазіргі таңда екі нысандағы жұмыстардың орындалу деңгейі 90 пайызға жеткен. Бұл спорттық нысандардың салынуы қала жастарының спортпен шұғылдануына және салауатты өмір салтын ұстануына жағдай жасайды.
Қала басшысы барлық нысандарда жұмыс кестесін сақтау, сапаны басты назарда ұстау және тұрғындарға қолайлы инфрақұрылым қалыптастырудың маңыздылығын атап өтті. Әзімбек Пазылбекұлының бұл сапары Түркістан қаласының дамуына және тұрғындардың өмір сүру сапасын жақсартуға бағытталған жұмыстардың қарқынды түрде жүргізіліп жатқанын көрсетеді. Қала әкімдігі қаланың инфрақұрылымын жақсарту және тұрғындарға қолайлы жағдай жасау үшін бар күшін салуда.
