Мемлекет басшысы алға қойған «Заң мен тәртіп» тұжырымдамасы аясында қоғамдық қауіпсіздікті нығайту және жол қозғалысы мәдениетін қалыптастыру бағытындағы жұмыстар қарқынды жүргізілуде. Осы орайда, 2026 жылғы 28-30 шілде аралығында еліміз бойынша «Автобус» жедел-профилактикалық іс-шарасы ұйымдастырылып жатыр. Аталған науқан Мақтаарал ауданында да өз жалғасын тауып, жолаушылар тасымалы саласындағы тәртіпті қатаң бақылауға алуда.
Аудандық полиция бөлімінің қызметкерлері қоғамдық көлік жүргізушілерінің жол жүру ережелерін сақтауын жіті тексеруден өткізуде. Рейдтік шаралардың негізгі мақсаты – жол-көлік оқиғаларының алдын алу, жолаушылардың өмірі мен денсаулығына төнетін қауіпті сейілту және заңсыз тасымалдау фактілеріне тосқауыл қою. Тәртіп сақшылары көлік құралдарының техникалық жай-күйін, жүргізушілердің құжаттарын және олардың жол бойындағы жауапкершілігін басты назарда ұстап отыр.
Қоғамдық көлік қызметінің сапасы мен заңдылығын қамтамасыз ету – аудан тұрғындарының қауіпсіздігі үшін аса маңызды. Осыған байланысты Мақтаарал ауданының полиция бөлімі барша жүргізушілер мен жолаушыларды жол қозғалысы ережелерін қатаң сақтауға шақырады. Әрбір азаматтың жауапкершілігі – жолдағы ортақ қауіпсіздіктің кепілі екенін естен шығармаған жөн. Тәртіп орнаған жерде ғана жолдар қауіпсіз болмақ.
