Биыл – Ұлы Жеңіске 80 жыл! Осыған орай елімізде осы мерекені атап өтуге дайындық басталып кетті. Түркістан облысында да аппарат мәжілісінде Жеңістің 80 жылдығын атап өту бойынша іс-шара жоспары кеңінен талқыланып, атқарылатын жұмыстар пысықталды.
Облыс әкімі Н.Көшеровтің төралығымен өткен жиында ҰОС ардагерлеріне Жеңістің 80 жылдығына орай әкімдік тарапынан 5 млн теңге, ҰОС ардагерлеріне теңестірілген азаматтарға санаттары бойынша 50 мыңнан 120 мың теңгеге дейін біржолғы қаржылай көмек көрсетілетіні туралы айтылды.
Бүгінгі таңда Түркістан облысында Ұлы Отан соғысына қатысушылар мен оларға теңестірілгендер саны – 3 305. Оның 9-ы – ҰОС ардагерлері. Олар Жетісай, Ордабасы, Отырар, Сайрам, Сарыағаш, Созақ, Қазығұрт аудандары мен Кентау, Түркістан қалаларында тұрады. ҰОС қатысушыларына теңестірілгендер саны 227 болса, тыл еңбеккерлері – 3 069.
Түркістан облысында ҰОС Жеңістің 80 жылдығына орай 3 305 адамға біржолғы ақшалай әлеуметтік көмек көрсету үшін аудан, қала бюджеттері есебінен 242,0 млн.теңге қаржы қаралды.
Облыстық жұмыспен қамтуды үйлестіру және әлеуметтік бағдарламалар басқармасының басшысы Асия Темірбаеваның баяндауынша, Ұлы Отан соғысы ардагерлері мен оған теңестірілген азаматтардың әлеуметтік жағдайын анықтау мақсатында аудан, қала әкімдіктері арқылы әлеуметтік картасы жасақталды. Олардың денсаулығы мен тұрмыстық жағдайы сараланды. Сауықтыру шараларын жүргізу мақсатында соғыс ардагерлеріне жасақталған әлеуметтік картаның нәтижесінде денсаулық сақтау саласы тарапынан жыл басынан 500-ге жуық ардагерге медициналық қызмет көрсетілді. Бұл қызмет жыл бойы көрсетілетін болады. Сонымен қатар «Ардагерлер үйі» мен «Мейір» ардагерлер үйі» арқылы айына 400-ге жуық, жылына 7 800 егде жастағы адамдарға сауықтыру қызметтері көрсетіліп келеді.
Жиында облыстық қоғамдық даму басқармасының басшысы Ерлан Күзембаев Жеңістің 80 жылдығы аясында облыста ұйымдастырылатын іс-шаралар жоспарын баяндады. Басқарма басшысының айтуынша, батырлардың есімдерін насихаттау мақсатында түрлі конкурстар, экскурсиялар, ғылыми-практикалық конференциялар, «Жас Ұлан» әскери-спорттық ойындары, бұқаралық спорттық шаралар, әскерлердің шеруі өткізіліп, мерекелік концерттер, тақырыптық кино кештері, архив құжаттары топтамасынан көрме, кездесулер ұйымдастыру жоспарлануда.
Жиын барысында 109 бірыңғай байланыс орталығының жұмысы сараланды. Облыс әкімі жауапты тұлғаларға халық ұсынысына құлақ аса отырып, инфрақұрылым жүйелерін жетілдіруді, абаттандыру жұмыстарын сапалы атқаруды тапсырды.
