Шымкентте зиянкестермен күрес шараларының алғашқы кезеңі басталды. Дендробақ аумағында жүргізілген дезинсекция жұмыстарына 30 маман, 20 арнайы техника жұмылдырылған.
Шымкент қаласы ауыл шаруашылығы және ветеринария басқармасының мәліметінше, мұндай жұмыстар өзен-көл жағалаулары, саябақтар, гүлзарлар мен аллеялар аумағында атқарылады.
Қала әкімінің тапсырмасына сәйкес биыл дезинсекция жасауға басымдық берілуде. Осыған дейін дезинсекция жылына төрт рет жасалса, биыл 10 рет жүргізілмек.
Зиянкестерге қарсы арнайы сертификатталған химиялық препараттар қолданылады. Мамандар олардың адам мен үй жануарларына зиянсыз екенін айтады. Сонымен қатар, масалары көп аймақтарды жою жұмыстары қатар жүргізілмек.Мамандар сондықтан тұрғындардан сақтық шараларын ұстануды сұранады.
“Дезинсекцияланған аймақтарда балалардың ойнамауын және тұрмыстық заттар өңделген жерлермен жанаспауын қадағалау қажет” дейді олар.
Мамандардың айтуынша, тұрғындар да өз аулаларын таза ұстап, судың жиналуына жол бермеу арқылы зиянкестердің көбеюінің алдын ала алады. Дезинсекцияны тұрғындар үйлерде, кәсіпкерлер аумақтарында өз қаражаты есебінен жүргізеді.
Дезинсекция жұмыстарының нақты кестесі туралы ақпаратты тиісті мекемелерден немесе қалалық әкімдіктің ресми сайтынан білуге болады.
