Мемлекет басшысы Қасым-Жомарт Тоқаев ғалымдарды марапаттау рәсімінде елімізде бір палаталы Құрылтай сайлауын өткізу туралы бастама көтеріп, бұл қадамның мемлекеттік маңызын ерекше атап өткен болатын. Осы стратегиялық міндетті жүзеге асыру мақсатында бүгінде Мақтаарал ауданында ауқымды дайындық жұмыстары қарқынды жүргізілуде.
Алдағы 23 тамызға белгіленген Қазақстан Республикасы Құрылтайы депутаттарының сайлауына орай, аудандық аумақтық сайлау комиссиясы учаскелік комиссия мүшелерінің кәсіби шеберлігін шыңдауға бағытталған арнайы оқыту семинарын өткізді. Жиынға учаскелік сайлау комиссияларының төрағалары мен хатшылары қатысып, алдағы науқанның заң талаптарына сай өтуінің қыр-сырын талқылады.
Семинар барысында аудандық аумақтық сайлау комиссиясы төрағасының орынбасары Ш.Сатыбалдиев дауыс беру күнін ұйымдастырудың негізгі кезеңдері мен тәртібіне тоқталып, әрбір қадамның заң аясында болуы қажеттігін баса айтты. Өз кезегінде комиссия хатшысы Г.Қалдарбекова сайлаушылар тізімімен жұмыс істеу, есептен шығару куәліктерін рәсімдеу және құжат айналымын жүргізудің маңызды тұстарын түсіндірді.
Қатысушылар өздерін толғандырған сауалдарға нақты жауап алып, сайлау процесінде туындауы мүмкін өзекті мәселелер бойынша пікір алмасты. Мұндай оқыту шаралары сайлау комиссиялары мүшелерінің жауапкершілігін арттырып қана қоймай, алдағы саяси науқанның ашық, әділ әрі жоғары деңгейде өтуіне кепілдік береді. Мақтааралдықтар үшін бұл сайлау – ел болашағына үлес қосатын маңызды кезең болмақ.
