Төртінші өнеркәсіптік революцияның негізгі модераторы «ақылды қалалар» саналады. Бүгінде Шымкент те «Ақылды қала» тұжырымдамасы бойынша дамудың жаңа жолына түсті. Осының негізінде мегаполисте қалыптасқан қалалық жүйеге ақылды технологиялар кезең-кезеңімен енгізілуде.
Шымкентте халық санының өсуі мен қала аумағының кеңеюі жол кептелісінің өсуі мен көлік ағынының ұлғаюына алып келді. Бұл өз кезегінде негізгі қиылыстарда кептелістерге және жол қозғалысын тиімсіз басқаруға әкеліп соқты. Қалаға нақты уақыт режимінде көлік ағындарын бақылай алатын, тиімді басқара алатын және оқиғаларға жауап бере алатын, осылайша жол қозғалысының барлық қатысушыларының қауіпсіздігі мен қолжетімділігін арттыратын күрделі жүйе қажет болды.
Осы мәселелерді шешу үшін Шымкент қаласының әкімдігі жол қозғалысын басқарудың инновациялық шешімдері саласындағы көшбасшы SmartMicro компаниясымен кешенді Интеллектуалды көлік жүйесін әзірлеу үшін серіктестік келісім жасасты. Жүйе бірнеше сенсорлық технология мен күрделі бағдарламалық жасақтаманы біріктіреді.
Осы орайда SmartMicro компаниясы өткен жылы Шымкент қаласы үшін 213 радар сатып алып, оның 207-сін орнатты, қалған 6 датчик қосалқы ретінде алынды. Аталған жүйе көлік құралдарын санау және оқиғаларды басқаруды қоса алғанда, әртүрлі функцияларды орындайды. Бұл жетілдірілген сенсорлар көлік ағындарын анықтауда дәлдігі мен сенімділігімен танымал.
Бүгінгі таңда ITS Шымкенттегі 244 қиылысты қамтиды,бұл көлік ағынын едәуір жақсартты, кептелісті азайтты. Деректерді уақытында беріп, ағымдағы жол жағдайларына байланысты бағдаршам сигналдарын орталықтандырылған бақылауға және автоматты түрде түзетуге мүмкіндік береді. SmartMicro сенсорларының дәлдігі көлік құралдарының санын дәл есептеуге және ағынды басқаруға, осы арқылы кептелістер мен апаттарға уақтылы жауап беруге мүмкіндік берді.
Сонымен қатар, төтенше жағдайларға жауап беру уақытын қысқартты. Өйткені қалалық қызметтер SmartMicro сенсорларынан алынған деректерді пайдалана отырып, жол қозғалысының бұзылуын немесе ақауларды тез арада жоя алады. Smartmicro технологиясына негізделген Интеллектуалды көлік жүйесін кезең-кезеңімен енгізу, сайып келгенде, Шымкент тұрғындары үшін жол жағдайын жақсартып, көлік желісін біркелкі және қауіпсіз ете түсті.
