Түркістан облысында барлық деңгейдегі мәслихат депутаттарының кезектен тыс сайлауына дайындық басталды. Өңір бойынша барлығы 338 депутат сайланбақ. Сайлау 2026 жылғы 29 қарашаға белгіленген.
Бүгін Түркістан облысының аумақтық сайлау комиссиясының отырысы өтіп, алдағы саяси науқанды ұйымдастыру мәселелері қаралды. Жиынды комиссия төрағасы Аңсар Өсербаев жүргізді.
Отырыс барысында Мемлекет басшысы Қасым-Жомарт Тоқаевтың 2026 жылғы 12 қазандағы «Барлық деңгейдегі мәслихаттардың өкілеттіктерін мерзімінен бұрын тоқтату туралы» Жарлығы мен ҚР Орталық сайлау комиссиясының тиісті қаулысы талқыланды. Күн тәртібіндегі негізгі мәселелер бойынша тиісті шешімдер қабылданды.
Сайлаудың негізгі кезеңдері бекітілді
Комиссия отырысында 29 қарашаға тағайындалған сайлауды дайындау мен өткізудің күнтізбелік жоспары бекітілді.
Жоспарға сәйкес:
- 14–27 қазан: кандидаттарды ұсыну;
- 1 қараша, сағат 18:00-ге дейін: кандидаттарды тіркеу;
- 1 қараша, сағат 18:00-ден кейін: сайлау алдындағы үгіт-насихат жұмыстарының басталуы;
- 28 қараша: тыныштық күні;
- 29 қараша: сайлау күні.
Сайлау алдындағы үгіт-насихат жұмыстары 28 қарашаға қараған түні, сағат 00:00-де аяқталады.
Өңірде 1,2 миллионнан астам сайлаушы бар
Алдағы сайлауды ұйымдастыруға облыс бойынша 1 285 сайлау комиссиясы жұмылдырылады. Олардың құрамында 7 976 маман жұмыс істейді.
Сайлау инфрақұрылымына облыстық, 17 аудандық және қалалық, округтік, сондай-ақ 952 учаскелік сайлау комиссиясы кіреді. Оның ішінде 26 жабық сайлау учаскесі бар.
ҚР Орталық сайлау комиссиясының 2026 жылғы 1 қазандағы деректеріне сәйкес, Түркістан облысында 1 209 560 сайлаушы тіркелген. Бұл өңір халқының шамамен 56 пайызына тең.
Осыған байланысты сайлау комиссиялары мен округтер туралы ақпаратты жұртшылыққа уақтылы жеткізу, азаматтарды өздерінің сайлау учаскелері туралы хабардар ету жұмыстары күшейтіледі.
Облыс бойынша 338 депутат сайланады
Алдағы кезектен тыс сайлауда Түркістан облысы бойынша жалпы 338 мәслихат депутаты сайланбақ.
Оның ішінде облыстық мәслихатқа 46 депутат сайланады. Олардың 23-і партиялық тізім бойынша, қалған 23-і бірмандаттық сайлау округтері арқылы анықталады.
Бұдан бөлек, аудандық және қалалық мәслихаттарға бірмандаттық сайлау округтері бойынша 292 депутат сайланады. Оның ішінде 44 депутат қалалық, 248 депутат аудандық мәслихаттарға сайланбақ.
Отырыс соңында облыстық аумақтық сайлау комиссиясының төрағасы сайлау науқанын заң талаптарына сәйкес, ашық әрі жоғары ұйымдастырушылық деңгейде өткізу үшін жауапты мекемелер мен комиссия мүшелеріне нақты тапсырмалар берді.
