Мемлекет басшысының тапсырмасына сәйкес елімізде «Заң мен тәртіп» тұжырымдамасы қатаң сақталуда. Осы бағыттағы жұмыстарды жүйелендіру және азаматтардың қауіпсіздігін қамтамасыз ету мақсатында Мақтаарал ауданында тұрғындармен арнайы кездесу ұйымдастырылды. Жиынның басты тақырыбы – жол-көлік оқиғаларының алдын алу және жол қозғалысы ережелерін қатаң сақтау мәселелеріне арналды.
Кездесу барысында құқық қорғау органдарының өкілдері жол жүрісі қауіпсіздігінің қоғамдық тәртіптің ажырамас бөлігі екенін атап өтті. Тұрғындарға жол бойында барынша қырағылық таныту, заң талаптарына бейжай қарамау және әрбір жүргізушінің өз өмірі мен өзгелердің тағдырына жауапты екені ескертілді. Әсіресе, көлік тізгіндеген кезде жылдамдықты шамадан тыс асырмау, қарама-қарсы бағытқа шығып кету сияқты өрескел қателіктерге жол бермеу керектігі баса айтылды. Сондай-ақ, мас күйінде көлік басқарудың ауыр зардаптары мен оған қолданылатын қатаң жазалар туралы түсіндіру жұмыстары жүргізілді.
Жиын соңында аудан тұрғындары өздерін толғандырған сауалдарын қойып, тиісті мамандардан нақты жауап алды. Кездесуге қатысушыларға құқық бұзушылықтың алдын алуға бағытталған арнайы ұсынымдар беріліп, жол мәдениетін қалыптастыру – әрбір азаматтың азаматтық борышы екені тағы бір мәрте еске салынды. Мұндай профилактикалық шаралар алдағы уақытта да өз жалғасын тауып, жол-көлік оқиғаларын азайтуға септігін тигізбек.
